Minung hna nih kan rak intuar mi achiakha bikmi zawnak (10) kong

Science (teihpan) lei mifimthiam hna le sii lei mifimthiam hna nih hin hii vawlei cungah a chuakmi zawtnak thalo mipawl hi phun hnih in an rak then. Zeitin dah an then tiah cun zawnak a rak chuah nak khua, miphun phunkhat cung ah a cangmi i chonh khawh asimi zawnak cun (Epidemic) tiah an ti i vawleicung pumpi ah ramkhat le ramkhat tiang i chonh khawh asimi zawtnak cu (Pandemic) tiah an rak ti.


Ngal-eu zawtnak, pa-leki zawtnak, cuar bo zawtnak, tlangrai zawtnak pawl hi vawlei cung tuanbia ah abikin mi nun nak a rak laa tu zawtnak an rak si i ramkhat le ramkhat, khuakhat le khuakhat lonh in cu zawtnak cu an rak i chonh hna i a karh fawingaimi zawtnak an rak si. Cu zawtnak pawl cu PANDEMIC zawtnak tiah auh an rak si i ahlei in a rak luan ciami kum (12000) chung ah hin cuar bo zawtnak ruang ah vawleicung ah hin minung tan(300) in tan (500) karlak hi an rak thi tiah tuanbia ah hmuh khawh a rak si.


Tuchan ah a cang cuahmah mi EPOLA zawtnak ruang ah hin minung hi a thong leng in an rak thih ban tuk in, tu ah asi cuahmah liomi Tuluk ram Wuhan khua in a thawk i vawleicung hmun kip kaa kip ah a chonh dihmi CORONA Virus ruang zong ah hin tutiang ah a thimi hii tan ( 3,800,841) leng an si cang i a zawmi hi tan (176,050,907) leng an si cang tiah theih asi. Kan hnu kum ah CORONA Virus zawtnak cu vawleicung zawtnak lakah i chonh areng bikmi zawtnak asi tiah WHO nih an rak timi asi.


Aliam ciami tuanbia ah hin hlanchan minung hna nih tih arak nung taktakmi zawtnak phun phun hi an rak intuar cang. Tu ten Lai Com thazang a kan pemi nan sinah kan rak chimh dingmi cu vawleicung ah a rak cang belmi minung nun nak a taan leng in a rak lami zawtnak phun (10) kong kan rak chimh lai.


(10)... HIV / AIDS (2005-2012)



(1976) kum lioah Africa Teih, Kuangku ram ah an rak hmuh hmasa bikmi AIDS tiah rak theih mi thazang, pumsa derthawm nak asimi zawtnak cu vawleicung ah tihnung tukmi zawtnak phunkhat a rak si i (1981) kum in tuatiang ah hin minung tan (36) leng hii cu zawtnak cun an nun nak hi liam. Tutiang ah hin vawleicung ah HIV zawtnak a chonh mi hii tan (31) in tan (35) karlak an si rih tiah theih asi i a tamdeuh hi Sub-Saharan Africa kulh chung piah tan (21) hrawng hi cu zawtnak cu an rak i chonh hna.


Ahnu nak ah cun HIV/ AIDS zawtnak caah i thlopbul nak sii-ai a phunphun in a rak chuah cang bantuk in zawtnak a chonh mihna caa zong ah sii thatha, minung hawi sin zong ah pakhat le pakhat i bomhchanh nak le zawtnak lei chim cawn nak zong tampi a rak um cang. Cuti a thangcho mi theihtlei a phunphun ruang ah cun (2005) kum in (2012) kum karlak ah hin vawleicung pumpi ah HIV/ AIDS zawtnak ruang ah athi mi (2.2) tan in (1.6) tan tiang hi a rak zor tiah theih asi.


(9)...FLU PANDEMIC (1968)



(1968) kum lio i Hong Kong ram ah a rak cangmi zawtnak cu The Hong Kong Flu (cumpit tlangrai) timi zawtnak asi. Flu Pandemic chung ah a telmi Influenza A virus i H3N2 timi sivai phunkhat ruang ah a rak si. Cazin (tuanbia) chung ah a rak um mi ah cun Hong Kong ah hin (1968) kum, July (13) ni in a rak i thawk i cozah nih biafiang ( thawng hman) a rak thanh hlan ni (17) lio hrawng tein Singapore le Vietnam ram ah zawtnak cu a rak phanmenh cang tiah theih asi i thla (3) a hun roh hnu ah cun Philippine, India, Australia, Europe le American rampi tiang hi a rak phan i cu zawtnak cu an rak i chonh menh hna.


Zawtnak a rak i thawk kum (1968) lioah hi zawtnak a rak i chonh mi chung in tan (1) leng an rak thi i zawtnak a rak i thawk nak Hong Kong ah cun ting (500000) tiang an rak thi. Cu zawtnak ruang ah cun Hong Kong mipi hna i an milu (100%) chung ah (15%) hrawng hi an rak thi tiah theih asi.


(8)...ASIAN FLU (1956-1958)



Influenza A, H2N3 virus ruang ah ASIAN FLU ( cumpit tlangrai) timi zawtnak zong hi Tuluk ram in a thawk mi a rak si i (1956) kum in (1958)kum tiang a rak si. Cu zawtnak picu Tuluk ram Guizhou khua in a rak i thawk i Singapore, Hong Kong le American rampi tiang cu zawtnak cu an rak i chonh tiah theih asi.


ASIAN FLU zawtnak ruang ah a thimi zeizat an sii ti cu Tuluk cozah pi nih a rak chim duhlo na in WHO i an ruah nak ah cun athimi hi tan(2) leng an si lai tiah an rak tii i American rampi ah cu zawtnak ruang ah cun minung (69800) hrawng hi an rak zaw i an rak thi tiah theih asi.


(7)...FLU PANDE MIC (1918)



(1918) kum in (1920) karlak i a rak cang mi FLU PANDAMIC zawtnak pi cu vawleicung pumpi ah a ummi minung cheuthum chung ah cheukhat leng cu zawtnak cu an rak i chonh i (1918) kum in (1920) karlak ah hin minung tan(20) in tan (50) karlak hi an rak thi. Spain ram ah mi pakhat a rak thih nak in cu zawtnak cu a ruah awk ah an rak theih i Spanish Flu tiah a min an rak bunh na in zawtnak a rak i thawk nak a hrampi taktak cu Tuluk ram chatlei khua pawl in a rak si tiah theih asi.


Cu zawtnak a chonh mi cu tan (500) tiang an rak si i (100%) chung ah (10% in 20%) thiang hrawng hi an rak thi. Zawtnak a rak i thawk kaa in zerh (25) karlak ah hin minung tan(25) tiang hrawng hi an rak thi. FLU PANDEMIC zawtnak hi a dang cumpit tlangrai ban tuk in kaa in a chuak mi taw le cilkari in fawituk in rak i chonh khawh asi i a bik in cu caan lio ah cun ngakchia le tar pawl atamdeuh hi cu zawtnak cun an rak thi.


(6)...SIXTH CHOLERA PANDEMIC (1910-1911)



(1910) kum lio ah Asia ram le India ram ah a rak si hmasa bikmi avui(6) nak ngal-eu zawtnak ruang ah India ram chung te lawngah (800000) leng an rak thi i cu zawtnak cu nichuahle ram, Nort Africa ram, Europe ram a cheukhat le Russia ram pawl tiang a rak phan in an rak i chonh hna.


SITH CHOLERA PANDEMIC cu a hnu nak ah American rampi tiang a rak phan. American ram sii lei mifimthiam hna nih cun cu zawtnak cu asi khawh chung in khamh khawh an rak i zuam lenko na in minung (11) tu cu an nun nak a rak liam thiam thiam. (1923) kum a phak hnu ah cun cu ngal-eu zawtnak cu sii lei mifimthiam hna an i zuam nak thawng in tlau lak in an rak damh khawh.


(5)...FLU PANDEMIC (1889-1890)



(1889) in (1890) karlak i a rak cangmi cumpit tlangrai (FLU PANDEMIC) zawtnak cu Asiatic Flu (or) Russian Flu tiah mipi nih an rak theih mi arak si i Influenza A virus i H2N2 ruang ah a rak simi a si. A thar an hmuh chapmi FLU PANDEMIC cu H3N8 virus ruang zong ah asi kho men tiah an rak ti. Cu zawtnak cu (1889) kum May thla chung ah Turkestan ram Bukhara khua, Canada ram Athabasca le Greenland tivakam khua ah an rak hmuh hmasa hna.


Kumzabu (19) lio hrawng cuu khuapi chung ah milu an rak karh cingling asi bantuk in FLU PANDEMIC zawtnak zong cu fawituk in le rengtuk in a rak karh vee nak hi asi. Kumk khat chung a rak rau vemi cu zawtnak pi cuu (1890) kum a hunphak hnu ah cun sii lei mifimthiam hna nih an rak khamh khawh ko na in minung tan(1) hrawng hi cu zawtnak cun an nun nak cu a rak liam thiamthiam thiah theih asi.


(4)...THIRD CHOLERA PANDEMIC (1852-1860)



Vawleicung ah a rak cangmi mi nun nak a rak laa cemmi ngal-eu zawtnak pa(7) lak ah avui(3) nak i a rak cangmi cu ngal-eu zawtnak hi (1852) kum in (1860) tiang a rak rau. Cu hlan i a rak cangmi ngal-eu zawtnak bantuk thiam thiam asi mi THIRD CHOLERA PANDEMIC zawtnak hi India ram in a rak i thawk i Ganges River Delta in Asian ram, Europe ram, American ram le Africa rampi tiang cu zawtnak cu an rak i chonh hna i a thi mi hi tan khat hrawng an rak si.


Ahnu nak ah cun British ram tamadaw asi mi John Snow timi nih Landon khua i a thurhnawm nak, a filhhnawm nak hmunhma pawl ah research a rak tuah hnu lawng ah ngal-eu zawtnak hi a thurhnawm mi dintii in a rak chuak mi asi tiah hlethlai nak cu thaten a rak tuah khawh. An vanchiat nak pakhat cu John nih zawtnak hrampi a rak hmuh khawh kum (1854) kum hi THIRD CHOLERA PANDEMIC zawtnak a rak zual cingling a rak si i British ram lawng ah hin minung (23000) hrawng hi ngal-eu zawtnak cun an nun nak a rak liam.


(3)...BLACK DEATH (1346-1353)



(1346) kum in (1353) karlak ah hin Europe ram, Asian ram le Africa ram ah a rak cangmi BLACK DEATH tiah min an rak bunh mi pa-leki zawtnak ruang ah a thi mi hi tan(75) in tan(200) karlak hi an rak thi. Cu zawtnak pi cuu Asian ram in a rak i thawk i Arab miphun thilphor tilawng cung ah a rak um tawn mi zuu sin in FLEAS timi siivai, rugnrul ruang ah a rak si.


Cu can lio ah cun Asian le Europe ramkhat le ramkhat tilawng in chawlet chawhrawl rak tuah ti cingling a rak sii ruang ah Arab tilawng pawl hi Europ ram pawl i tilawng dinh nak ah an rak i dinh pahtawn tik ah hin cu zawtnak cu Europ rampi tiang a rak i chonh vee. Cu lio i BLACK DEATH zawtnak ruang ah Europe rampi ah hin minung tamtuk an rak thih ruang ah Europe ram tuanbia ah cun caan chiabik zawtnak kan tuar kum asi tiin an rak ti.


(2)...PLAGUE OF JUSTINIAN (541-542)



PLAGUE OF JUSTINIAN tiah min an rak bunh mi zawtnak pi zong nih hin Europe ram ah minung taan tampi an nun nak a rak lak hna. (541) kum in (542) karlak ah hin Rome Empire tiah rak tii mi Byzantine Empire ram chung pi ah hin a rak cangmi a rak si. Cu zawtnak ruang ah cun a thi mi hi tan(25) hrawng an rak si i tilawng cung ah a rak um mi zuu pawl sin in FLEAS timi rungrul sin in a rak chuak mi asi.


PLAGUE OF JUSTINIAN ruang ah hin Rome Empire pi i Constantinople timi khuapi chung ah cu zawtnak a rak i thawk ka lio hrawng ah cun nikhat chung ah a thi mi hi(5000) tiang hrawng an rak si tiah theih asi i a hnu nak ah cun khupi chung i a um mi minung hnarcheu hrawng lawng hi an nun nak a rak himbawm tiah tuanbia an tialmi ah rak hmuh khawh asi.


(1)...ANTONINE PLAGUE (165 AD)



AD (165) chan lio i a rak cangmi Plague Of Galen tiah rak theih mi ANTONINE PLAGUE zawtnak pi a hram a rak i thawk nak cu Asia Minor ram, Egypt, Greek le Italy ram pawl ah hin a rak si i zawtnak hrampi a thawk ning tu cu an rak thei kholo. Cu zawtnak a rak i phorh tu hna cu Mesopotamia ram in a rak kirmi Rome ralkap pawl an rak si. Cu zawtnak ruang ah cun a thi mi hi tan(5) hrawng an rak si.


Rome ralkap pawl hi Mesopotamia ram ah a rak um mi Seleucia timi khua an rak doh dih hnu ah hi zawtnak an rak i chonh hi a rak si. Rome siangpahrang Lucius Verus zong hi cu zawtnak in cun a rak thih hi asi lai tiah mifimthiam hna nih hin an rak ruah mi asi. Hi zawtnak hi Tuluk ram tiang zong a rak i chonh tiah tuanbia ah hin rak hmuh khawh asi.

Popular Posts