Hitler A Nun Nak Arak Khamh Tu


 Avui (2) nak vawleicung ralpi cu Nazi ralbawi Hitler ruang ah a rak sii ti hi cuu mi zapi nih kan rak theihdih ko nain avui (1) nak vawleicung ralpi lio i a rak sungmi Germany cung ah England le France ram nih anmah duhning lawng in an rak tuah mi Vassal sachoh zong hi ralpi a rak thawh tar thantu ah hin a rak i tel vemi a si. Banabia ah Hitler hi a mah nih a rak huam mite hmanthlak suai nak lei ah saya raktuan sehlaw (asiloah) ralram a rak kal velio avui (1) nak ralpi lio ah hin rak thi sehlaw vawleicung tuanbia pi hi phundang pi zong hin a rak sii khomen.


(1918) kum, November (11) hi avui (1) nak vawleicung ralpi tazavun tein an rak ngol nii a rak si i vawleicung ralkap hlun pawl upat pek ni tizong in an rak ti i American rampi ah cun tazavun ten zungkhar ni tizong in an rak tii. British le France ram pawl ah cun cu ni cuu vawleicung ah tih a rak nungbik mi ral vialte a rak deihdih kum tiah an rak ti i hihnu hmailei ah hibantuk ral i tuk hi vawleicung ah a um than tilailo ti tiang in an rak i ruah chihmi a rak si. Asinain Nazi ralbawi Hitler chan a hunphak hnu ah cun cu an khuaruah nak cu alet talam lawng tee a rak sidih.


Nazi ralbawi a rak si dingmi Adolf Hitler zong hi avui (1) nak vawleicung ralpi lio ah adang Germany pa pawl bantuk in ralkap ah a rak lutve i hmaiah chuak in ral a rak tuu ve ko nain a van rak tha i a nun nak hi a rak himbawm. Bom le miakpi tule tute a tlak nak, i thuh nak caa i khor an cawhmi khorkhat le khorkhat i chok in cunglei nih nawl an chuahmi caa a rak phawtu hna Hitler cu (1918) kum, November (28) ah cun hma a rak ing ruang ah hmuar hmul sau nawn le kha hmul sau nawn pi he khor chung ah cun a rak it ko.


Cu liopi ah cun British ralkap pakhat cu cuka hmun cu a rak phan i Hitler cu an rak hmuh i kah a rak timh ko nain a nun nak cu a rak zuah than. A hnu nak ah Hitler cu a bawh buu in a rak lawn chih ve i a him khawh nak ding hmunhma ah a rak zam ve. Hitler a nun nak a rak khamhtu pa cuu British ralkap Henry Tandey timi pa a rak si i nitlak lei ralram ah kum (4) chung ral a rak tubel cangmi a rak si.


Henry Tandey hi Belgian ram ah a rak cangmi Ypres ral rak i tuk nak ah lee, (1918) kum lio i France ram ral a rak tuk nak ah hin thii ding tiang in hma vui (2) tiang a rak ing ko nain raltuk nak ah a rak i tel khothan mi a rak si. Zohchuanh awktlak, paraltha timi laksawng pawl zong hi tampi a rak ngah mi a rak si i American ralkap nih an pekmi hna Medal Of Honor timi he a lomi British rampi nih ram caah hmai ah fong in ral a rak tuumi hna laksawng an rak pekmi hna lak ah asunglawi bikmi Victoria Cross timi laksawng an rak pekmi pa zong a rak si fawn.


Henry Tandey i micung ah thlachiat ruah nak lungput a rak ngeih mi a rak tingco tu Hitler cu Germany ram ah a nun buu ten a rak kir kho than i a nun nak a rak khamh tu ralkap pa cu a rak kawl, a rak hlethlai leen. Nikhat cu tadinca ah British ralkap lei nih Victoria Cross laksawng an pekmi Henry Tandey i a hmanthlak a rak hmuh i Hitler nih a nun nak a khamhtu a si cuu a rak theih. Hitler nih cun cuu tadinca chung i a nun nak a rak khamh tu Henry Tandey i a hmanthlak cu kum (20) chung tiang hrawng a rak i chiah tiah an rak ti.


(1930) kum a hun phak hnu ah cun Italy miphun hmanthlak suaithiam Fortunino Matania nih hma a ing mi ralkap pakhat cu a himbawm nak hmunhma leiah Henry Tandey nih a rak kalpi lio hmathlak a rak suai mi cu British ram i Green Howard ralkap zungpi ah an rak chiah timi kong cu Hitler nih an rak theih ve. Cu hnu ah cun Hitler nih remdeih nak lei in cu hmanthlak khawpi cu ngah khawh a rak i zuam i (1937) kum a phak hnu ah cun a rak i ngeih khawh.


(1938) kum lio ah British vuanci choh Chamberlain nih avui (2) vawleicung ralpi thawhtar a tim mi Hitler a lung a thlen khawh nak ding caah biaruah ah Munich khua a va tlawn lioah Hitler nih a innkhan chung ah sunglawi tukin a chiah mi British ralkap hmathlak pakhat cu a rak hmuh. Cu tikah thil sining konglam cu Hitler cu a rak hal tikah Hitler nih mah hmanthlak chung i mipa hi ka nun nak a ka khamh tu asi tiah a rak leh. Amah rak um hlahseh law a tu bantuk hin vawleicung ramthawng Germany ram timi hi a rak um kho hngalo tiah a rak ti. Cuun Hitler nih Henry Tandey chungkhar sinah zeitin dah a dawtnak hi ka lehrulh lai tiah Chamberlain sin in biacah nak zong a rak tuah tiah rak theih asi.


British vuanci choh Chamberlain cu Munich in a kir hnuah Henry Tandey cu a auh i Hitler he thial a rak cangmi khon cu a hal tikah Henry Tandey nih a hmanmi asiko tiah an rak leh. Henry Tandey nih a hmasabik ah cun kah ka rak timh ko nain Hitler cuu hma he an rak um tikah kah than lo in kal a duh nak hmun ah kal nak nawl ka rak pek tiah a rak ti.


Cun a rak theih belmi ralram zulhphung ah raltuk ngolhnu ah cun hma a ing mi ral pawl cuu kahding ansi lo timi ralkap zulhphung zong hi a um tiah a rak tii hna. Chamberlain nih cun Hitler nih nasin ah lunglomh nak langtar a tim tiah Henry Tandey cu a rak chimh ko nain Henry nih cun avui (2) nak vawleicung ralpi a rak i thawk tiah ah cuu kong he pehtlai in zeibia hmenh a rak chim tilo.


Avui (2) nak ralpi lio ah cun Henry Tandey cu ralram ah kal in raltuk an rak i tim tukve ko na in a kumkhua a upat leng ah a hmathing pawl ruang ah a rak kal kholo i a um nak hmun in rampi caah rian cu a rak tuan thiam thiam. A hlei in Germany ralkap vanlawng nih bom in tule tute a kah mi hna England ram Conventry khua ah Henry Tandey cu thlopbul nak lei bomhchanh nak rian a rak tuan tiah an tuanbia ah hin rak hmuh khawh asi.


Tuanbia lei mifimthiam a cheukhat nih cun Germany rampi hi Hitler nih rak hruai hna hlahseh law hitluk ram thawng hi a rak sikho lailo tiah an rak ti i Henry Tandey nih Hitler cung i zangfah nak lungthin a rak ngeih mi hi vawlei pumpi caah piahtana pakhat zong a rak si tia tiang in an rak ti. Henry Tandey nih cun ralram zulhphung ningten ka tuah a rak ti ko nain cu caan lio i ralkap tamdeuh nih cun cu zulhphung cu an rak zullo tiah rak theih a si. Ka ral asi ti theihko mi cu honihdah rak kah lo le rak thah lo cun an rak umkhawh ve hnga. Henry Tandey hi ralpi a rak dih hnu zong ah Conventry khua ah umhmun cu a rak khuar beh i (1977) kum, December (20) ni ah a nun nak a rak liam. A rak thih lio ah hin kum (86) a rak si cang. A ruak tucu Marcoing ah a ummi British ralkap thlan ah a rak liam ciami a hawi le sin ah an rak vui ve tiah a tuanbia kan rak hmuh khawh mi hi asi.

Popular Posts